Tangkhul Khararnao Long Shillong ‘Get Together’ 2015 Khaying kachang wui

Tangkhul Khararnao Long Shillong ‘Get Together’ 2015 Khaying kachang wui tarik tharada-kachishat thang (18th) Tangkhul Khararnao Long Shillong na Naga Community Hall, Nongrihm Hills li kazip akha rungmiya. Kazip chi Ql Pamchuila Kapai kala Qr Singyo Zimik na thanmiya. Ql Homila Shimrayna haokaphok seiha suihaimilaka kazip chi haophoka. Qr Joseph Somi Ngasainao, Khararlong wui yaruiwo, na samkaphang tuihaoli kazip chiwui matailak kahai ningrin hangchitheimiya. Kazip chiwui ningrin chiya Shillongli pamda khalei Tangkhul kharanaobing zakmai theingarokda leishi manoda pamkhavaina. Hithada samngarok laka imaram wui Haolaa nganui ngarumda kala Pheizak zakngarumlaka imaramwui ngashan mayon khavai apong akha ngasaranu da Yaruiwona katomsangmi. Awui tuihaoli Kharar Longna singra kahai otsin teomeikhala yaruili chitheimi. Otsin bing chiya: Tangkhul Katamnao bingli katom khami, Shillongli Tangkhulnao kathi kasar kashok li Coffin ngaran khami, Iyur Naga wui ningkhanrin maramli seminar rungkhami, naoshinaobing wui vang Talent Exposure rungkhami kala Kachar district wui Zeme Naga bingli ngachon khami. Qr Yaruikhai Raman kala ngasotnao bingwui pheizak kala Qr Mayachung Ningshen kala ngasotnao, Qr Wungmayon kala ngasotnao kala Ql Holy Raihing kala ngasotnaobingwui Haolaa china imaram wui ngashan phaning ung ngasakka. Haolaa bingwui ngachai chili leishat laala akha hithada zanga: Oh! Ungda kaheilo Makahei akha Khaung matheiya Oh! Ungkharena thingna reosangsa Reokasanga thingna ngahuiya Pheichon yun yun harshang ungshunga. Laa kala pheizak chi nganamamanda kala yengmamanda kazipda khalei yarui kachungkhali thuikahai yaron ngalawui atamla ningmayunglak eina phaning ung ngasakka. Kazip chiwui khare kasatsang khame hi Qr Yaruingam Shimray (Mangaer,United Bank of India) na khuimiya. Okathui ngalang kazar kala thaklak eina ngacheida khalei okthot hili Tangkhul ava ava sada khaleibing naongarbingli kathada yengsangmida nganaoka dalei kala naongarabimgli atam mathada milak daleila kachiwui maramli lumtumlak eina katomsang miya. Kakhane kasatsang khame hi Qr Timothy Ramror (Senior Atomic Scientist) na khuimiya. Aja ava ava ngarabingna shokrada khalei naongarbingli khi ‘legacy’haimihaira kala khi haimingayi khala kachili rinda matuimiya. Pheizak, Haolaa kala Kasat kasang chimang china mashap mana chihaoda kazip chili lumshilao Qr StandhopeSharon kala Joseph Shimray na khukamida yarui ashangvali ningyang unglak eina manakakhuila samphangasaka. Kazipchi ngachangsang mamanda akuplamvak yarui ngasan khangarum atamla khuikaya. Ngasan ngarum kasawui khamataiya maramva: zinngkum kachida hikatha ‘Get Together’ kazip leisikha maning akha Luira Phanit eina mayon sikhalada ngasan ngarumma. Yaruiwui ningkachang athishurda rarada khalei zingkum bingliva Luira Phanit mayon sada khamaya khuingaroka. Kazip chiwui ningkashi tui Qr Yireichan Raihing na sami kala khangachang seiha Qr James Shimrah (Retd. Honorary Captain,Indian Army) na samida yaruibing phazangarumlaga kazip chi ringphalak eina kupkasang samphanga. -Chanpao